Jutros najranije mora san bacit moju susidu Šjora Filu do na splisko grobje Lovirinac jerbo san joj to još jučer bija obeća.
Naravski da mi je počela zvonit na vrata već u osan uri - taman dok san pija čaj i maza oni lipljivi sir po baškotinu.
Ala, ala...ulizite Šjora File - otvoreno je !
Zdrav mi bija moj Marinko ! A okad vi to držite otvorenu kuću ? Pa grad je pun lupeži...Još će du ji metat po kućan i stanovima jerbo višje i nima mista po pržunima !
Ma ko će nan ovod na Pujanke poč rumbavat vrata i provaljivat u stanove...dobra moja Šjora File ? Pa ovod Van živi pobasji svit a ne bogatuni i tajkuni ! Oli ste, recimo, Vi bogati ?
A vengo ča da jesan ! Jučer mi je sa Šolte svojta poslala dvi škrpine i tri četri ugorića...Ona najslaja...ča ji mi zovemo špigetama. Nema većeg gušta vengo ji pofrigat i cile isčućat. Ka cukar su !
A bogami...to je većpravo bogatstvo u ova vrimena. Jemate Vi ča i čuvat !
Ma oči bi iskopala onome ko bi ji mi samo taka a ne doša vazest ! E ! Završi ona značajno savivši svoje koštunjave prste u neku poza ka ono kad te maška oče očeprjat .
Ma ča to nosite u ruke ?
A evo san ti donili malo brujetića o papalini sa suvicama o našeg domćeg grozja da se malo pokripiš. A i bocu praaaavega šoltanskog maslinova uja da ga malo okusiš jerbo je on najboja likarija za sve bolešćine....
Oli ste me i Vi već pokopali ?
Aj ne pizdi...Nisan ja o jučer...Još meni radi žveljarin u glavi. I to boje vengo da je švicarski. Zato uvik ja znan koja je ura ! Jema ji puno ča bi te živa pokopali, merlo moje, jerbo si uvik bija na istoj strani i nisi se da...A jesu navalili na te ka gaštapani i pantagane o kanalizacije.
Nemojte tako. Sve je to samo zaraj politike !
Pa naravski. Ka da san ja rebambila pa višje ne razumin u kojemu grmu leži zec ? Okad je svita i vika judi ti se, moj Marinko, nisu makli naprid njanka za jedan pedalj. Zanavik jemai navik će bit i onih glupi i onih prez pameti, i pokvarenih ma bome i dobrih judi. I nemoj mislit da će to ikad bit drugovačije !
Ma ovod Van je rič o primitivcima i duhovnim mižerjama ča priživjavadu ka plaćenici - govoreći i pišući ča jin gazde naredidu. A jema i pokoji blento ča ne razumi "boga tebe" pa izmišja stvari kako bi od ničega napravija paštu !
Ni njima laka moj Marinko ! To je grozan život !
Nije in laka..znan ja to, zato ji puno i ne obadajen !
Vengo, ajmo mi polako put grobja jerbo još moran vazest cviće. Doli san ga naručila u onega našega cvičara na Pujanke !
Je. Odlišan je to i pravi je momak ! Ni mu laka...jerbo su i obrtnici najebali od onoga ča su jinovi na vlasti uradili svih ovih godina. Lipu su jin papu skuvali !
A štaš poć i govorit !
I tako se mi polako skalamo isprid portuna i lipo onda auton, priko cvičarne pa do Lovrinca. Šjora Fila je metnila cviće i očistila ploću o greba o jedne svoje dobre pokojne prijatejice...pustila dvi suze...jerbo joj je danas bila godišnjica o partence na oni svit i duboko uzdahnila, ispružila se ka čempres i čemerno zaključila: "Sve ti je, sinko moj, crna zemja i svi ćemo doć dragemu Bogu na ispovid položit račune za život kojega smo proživičli ili uludo ili ka prava i poštena čejad !"
A ča se tu more. Ko se kod rodija va mu jednega dana i partit na "oni svit",
Baš tako ! Ma puno njih to zaboravja i misli da su vićnost dotakli kad su drugega opljačkali ili se lopovski obogatili. Ka da če jin lipa manđa i zlatni brančoleti i kolajne donit sriću. Evo jin na roge.....I peta Šjora File roge u daljinu u nikon neodređenon pravcu....
Ajmo ča...Vodin Vas na kafu !
Ti pij kafu, ma ču ja Marinko...koji žešći bibit, zaraj pokoja duši mojoj dobroj Franici.
More !
I odvezemo se do Žbirca na Bačvice jerbo je tamo sad lipo sunce a i uz more je.
Evo ovod san Van se ja rodija, moja Šjora File !
Oli si ti sa Baćvic !?
A jesan.
A ja san uvik mislila da si ti iz Poljuda !
Doli san živija cili život jerbo smo tamo jemali svoja poja i svoju kuću ča mi je pokojni did Marin napravija još 1939. godine. A inače smo mi iz Velog Varoša iz Kamenite ulice...Tamo još žividu Jurjevići. Ma san se, eto, rodija na Baće...
Nego, sunce moje, ča te se ono uvatija oni Petronijević ?
Koji Van je sad to ? Ne znan ni jednega su tin prezimenon.
Ma, za gospu blaženu, unuk mi je nikidan donija oni "Nacional" - pa te tamo oti Petronijev...Oli kako li se već zove .... pljuje da kako si sa Kerumon ispleja cilu paukovu mrižu, da radiš monade okolo kandidata za gradonačelnika, da ste sve u dogovoru i svašta drugega ma ništa lipega. Da si zaposlija i ovega i onega u Keruma....a Bože oslobodi ! Gadilo mi se slušat unuka di mi čita !
To Vi govorite o Damiru Petranoviću koji bidan zarađuje za suvi kruv pljuvajući me ...pa jema već bar dvi godine. To Van je oni, moja šjora File, ča je u oni kupusov list "Vrime" pisa sve najgore o meni kad san se kandidira za pridsidnika esdepeja u Splitu. Pa znan mu ja gospodare ča ga držidu na lancu ka kucina. Dobije za to od njih koju kost i nikako priživljava glođući je. A je mi je bija natakarija onu sliku na naslovnici pa umisto Aghtum ! Aghtum ! - napisa je su velikin slovima, da se i oni najčoraviji ne zabunidu, ODLAZI ! Ka ono kako to gazda kaže šegrtu oli malome o kužine..
A da momak nije prosvira ?
Ma nije ! Vengo pleše kako drugi sviraju ! Ka lutak u dičinje kazalište !
A koje skule je on finija ?
Ono ča ja znaden oli su midrugi rekli...višje se i ne sićan...mali je propali študent - ma se u sve razumi ka niki spliski Leonardo da Vinči. Ča manje skule to višje kuraže da piše ča mu padne na pamet oli ča sanja priko noći...oli ča mu naredidu jerbo triba priživit. A jemamo mi u Splitu i za takve ime...ali neka ga !
Onda mu ni laka !
Ma kakvi ! Evo, meni ga je žaj toliko da mi suza udre na oko kad vidin ča sve ne izventaje o meni ne bi li ča boje proda svoje izmišljotine.
Bidno dite !
Je, je...Eno mu je i ota štraca o noviune "Vrime" stala izlazit kad san ja izabran za pridsidnika SDP Split. Propa jin posa ! A ko se more pofalit da su samo zaraj njega izumislili cilu novinu,,,an ?
Bogami si ti onda velika čunka, ka nika faca !
Boje čunka vengo makako ili ka oni pivac o late ča stoji na vrj fumara i okreće se kako vitar puše.
Ola ludonje, Marinko moj, proštija mi je unuk da kako te Milanović ne more vidit ni štampanoga i da te metnija tek na treće misto o liste za Sabor. Koji cukun ! Koji kukumar !
Pustite dite. Još se razvija. Isprid mene su dva odlišna esdepeovca koje bi i sam stavija isprid sebe....a Zoran je čovik koji je ovon kampanjon pokaza da je sazrija u najkvalitetnijeg rvackog političara i da moremo bit ponosni načinon kako nas je u kampanji vodija - pa će zato zasluženo i postat premijer. Da napokon svane i ovemu puku. Naravski da nima promina priko noći i da nas čeka još puno drača, trapula, stinai kretena na putu. Ali krenuti pravin puten već je velika stvar. A to će nova vlasti Zoran napokon učinit.
Ma svaka ti piva, sinko moj....aj da nazdravimo i za Vašu pobidu.
More !
I nagne ona svoj bićerin prošeka o Dalmacijavina a ja teplu čikaru s Lipton čajem.
Nego, Marinko moj...isto mi je žaj otega malega, kako se ono zove...?
Damira !
E....tega ča čini makaka o sbe. Ja bi ti njega posvojila. More bit da bi mu to pomoglo jerbo ja znan su dicon a i jeman dosta godišć.
Ma Van je on već ka niko dite koje je bokun nareslo !
Pa ča onda....More on narest koliko oče ako je osta dite uglavu...e, bome ! Onda će uvik ostat dite !
To ste Vi ka nika sestra milosrdnica.
Nisan ja nikakva švora nego žena sa šoltanske mižerje ma čvrsta ka smrika...Nemoš ti mene lako izgulit iz tvrde zemje niti mi polomit ovo suvo tilo.
Znan ja to.
Eto, ja bi vazela i njega i Jadranku Kosor zajedno. More bit da i za nju jema još prilike da se vrati na se i da ne ode u svemirce.
Koji su Van sad svemirci pali na pamet, za majku Božju....
Kako koji ! Pa oti njezini kumpanjoni. Oli on već na po nije svemirac ? Bila je prvo jubimica o Sanadera....Motala mu se oko noguj ka prilipak. Prin toga je bila u komuniste kad je ono napadala Crikvu u kojoj san se ja krstila, krizmala i Boga molila oduvik. Ka i svi moji ! Sad u prevemu redu gre ka Sveta Mande i glumi Gospu o sedan žalosti ! Pa onda zove mirne jude da mirne ruke glasadu za nju a u Šibeniku poskakuje i plješće rukama ka da je, bože me oslobodi, malo nacikla kad oni njezin pajdaš i član hadezejskog pridsidništva Kulušić poziva na obraćune su ovima ća se volidu po svoju i su kin oćedu.
Je, to je primitivno i opasno !
A dašta je !? Ko je vidija gluumit koludricu i pozivat na mržnju ?
A je....
Pa joj Kerum na Prokurativama u Splitu piva jubavne pisme i viče kako su ovi na livici "antirvacka opcija" a ona opet poskakuje i klepeće rukicanon veselja i puste sriće ! A do jučer je Kerum pjuva i hadezejce i njezinu Vladu....Moš mislit koja je to jubav prezikakvog interesa ! Za krepat o smija !
Pa ja bi zato i njoj tila doć upomoć..Spasit je o još većeg zla...da i ona more mirno leć u svoju postelju ka ča ja legnem mirno u moju kočetu o peršone i po i zaspen ka anđel jerbo niko nije mora letit iz moga stana da bi ja ulizla u njega. Nikor se ni ubija zaraj nesriknjih gulanfera ča su jude italiiz njihovih stanova na cestu prez ičega da žividu ka pasi.
Gadna su to bila vrimena !
Jesu. Zato bi ja pukovnicu Kosoricu posvojila i priodgojila - da joj bude višje do jubavi vengo do mržnje. Evo ... pa nek onda jema dvi matere ! Ja bi joj tila pomoć jer se za svaku dušu triba borit, sinko moj....Nije sve u brošiman !
Vi ste jedna žena na pravemu mistu moja dobra Šjora File ! Ali nemojte zaludu trošit riči...nima Van ništa od tega. Proć će i ovi izbori koji će i Šjoru Jadranku stavit na pravo misto.Tamo di i triba da bude. More bit da joj baš triba udrit, da izvinite, gujicon o tle pa da dojda sebi....
A ne, ne....A ča si ti mislija . Ne bi njoj tribalo past gujicon na pod pa da dojde seb i- Ja bi je ka prava mater lipo šibon , kako se to fino reče, po debelon mesu sve dok je ne bi dricala i o nje učinila skromno i ponizno čejade .... jerbo joj nos nikako previše gleda uvis ka da je resla na ingleškon dvoru a ne ka obišna cura koja je , eto, kad je tribalo bila za Partiju a sad se priti nikin crvenim opasnostima. Opasni su, Marinko moj, oni ča minjadu kolure ka nike žene mudante.
To bi ste Vi od nje opet napravili "crvenu" ?
Je - ali za početak bi krenila od gujice, jer to ti je tako su dicon. Najila bi se ona batina o moje šibe i ne boj se, brzo bi jopet uvatila onu crvenu koluru o mlade Jadre, bivše velike partijske nade !
|
